ហ្សកដានី៖ រដ្ឋមន្រ្តីការពារជាតិអាមេរិក លោក Lloyd Austin បានធ្វើដំណើរដល់ប្រទេសហ្សកដានី នៅថ្ងៃអាទិត្យ ទី០៥​ ខែមីនា ដែលជាការចាប់ផ្តើមដំណើរទស្សនកិច្ចរបស់លោកនៅតំបន់ប្រទេសមជ្ឈិមបូព៌ា។ ក្រៅពីដំណើរទស្សនកិច្ចនៅប្រទេសហ្សកដានី លោក Lloyd Austin ក៏នឹងធ្វើដំណើរទៅកាន់ប្រទេសអ៉ីស្រាអែល, អេហ្ស៊ីបផងដែរ ក្នុងគោលបំណងបង្ហាញការគាំទ្រសម្រាប់សម្ព័ន្ធមិត្តក្នុងតំបន់ដ៏សំខាន់របស់ខ្លួនប្រឆាំងនឹងការគំរាមកំហែងកាន់តែខ្លាំងឡើងដែលបង្កឡើងដោយប្រទេសអ៉ីរ៉ង់។ 

លោក Austin បានសរសេរនៅលើបណ្តាញសង្គម Twitter របស់លោកនៅមុនពេលដែលធ្វើដំណើរចេញពីសហរដ្ឋអាមេរិកថា៖ "លោកនឹងជួបមេដឹកនាំសំខាន់ៗ និងបញ្ជាក់ឡើងវិញនូវការប្តេជ្ញាចិត្តរបស់សហរដ្ឋអាមេរិកចំពោះស្ថិរភាពក្នុងតំបន់ និងការជំរុញផលប្រយោជន៍រួមរបស់សម្ព័ន្ធមិត្ត និងដៃគូរបស់ខ្លួន"។ ដោយឡែក ក្រសួងការពារជាតិអាមេរិកបាននិយាយនៅមុនដំណើរទស្សនកិច្ចនេះថា ការពិភាក្សានឹងផ្តោតលើបញ្ហានៃការគំរាមកំហែងកាន់តែខ្លាំងដែលប្រទេសអ៉ីរ៉ង់បានបង្កឡើងចំពោះស្ថិរភាពក្នុងតំបន់ និងលើការជំរុញកិច្ចសហប្រតិបត្តិការសន្តិសុខពហុភាគីជាមួយនឹងការការពារដែនអាកាស និងមីស៊ីលរួមបញ្ចូលគ្នា។

ការពិភាក្សានេះនឹងផ្តោតខ្លាំងបំផុតទៅលើការគំរាមកំហែងរបស់អ៉ីរ៉ង់ រួមមាន ការបំពាក់អាវុធថ្មីៗរបស់អ៉ីរ៉ង់ ការហ្វឹកហ្វឺន និងការផ្តល់មូលនិធិដល់ក្រុម Proxy បញ្ហានៃការប៉ះទង្គិច និងអំពើហិង្សា ការឈ្លានពាននៅលើផ្ទៃសមុទ្រ ការគំរាមកំហែងតាមបណ្ដាញអ៉ីនធឺណេត កម្មវិធីមីស៊ីលផ្លោង និងការវាយប្រហារដោយយន្តហោះគ្មានមនុស្សបើកជាដើម។ 

មន្រ្តីរបស់សហរដ្ឋអាមេរិកក៏បានបញ្ជាក់ដែរថា នៅក្នុងដំណើរទៅកាន់ប្រទេសអ៉ីស្រាអែល លោក Austin  ក៏នឹងលើកឡើងពីការព្រួយបារម្ភរបស់លោកអំពីការកើនឡើងនៃអំពើហិង្សានៅតំបន់ West Bank ដែលបានធ្វើឱ្យមេដឹកនាំប្រទេសហ្សកដានី និងអារ៉ាប់ និងពិភាក្សាអំពីកិច្ចខិតខំប្រឹងប្រែងការទូតដើម្បីកាត់បន្ថយភាពតានតឹងនៅមុនថ្ងៃបុណ្យសាសនាមូស្លីម និងជ្វីហ្វនាពេលខាងមុខ៕